闲话少叙。此刻宝玉心里决计归旋，便与阿珠商议搬运之策。阿珠道：“倪故歇转去是呒啥，不过甩脱格种好生意，像煞可惜点罢哉。如果一定要回上海，我也弗好阻当，但有一说，倪格几化铜钿银子，若带现格去，路浪恐怕勿小心，露仔眼末那处？俗语叫‘财不露白’，格倒顶顶要紧，终要想点法子末好运转去。”宝玉道：“要末写张汇票，汇到仔上海罢。”阿珠道：“好是蛮好，终勿十二分稳当，而且拨别人容易晓得。倒勿如多打点金叶子，放勒箱子铺盖里，阿比汇稳当点介？”宝玉道：“倒也勿差，准其替奴去办末哉。不过日脚勿能长远格。”阿珠道：“格是自然，包两三日就舒齐阿好？”宝玉又道：“倪格套红木家生比仔勒上海格更好，甩脱俚末可惜，带俚去末难拿，到底哪哼呢？”阿珠道：“有啥难拿介？只要多叫几个脚夫，扛下仔船，船浪格茶房多拨俚点酒钱，叫俚放得好点，勿要碰伤坏仔。一到上海，用两部塌车，车到仔格搭，并勿万难。况且倪人手也多，谅来终看得完善格哉。想阿对佬？”宝玉点点头，顺手取过历本一看，拣定十月廿五日动身。今天已是十九，相距仅有五日，不免有一番忙碌。两人计议妥当，诸事托阿珠办理。先将细软物件收拾收拾，装箱打包，自有娘姨等帮忙，不须宝玉费心。且宝玉嘱咐一班用人：凡有客人到来，一概不许提起，免得临时纠缠。这几日别无书说，惟预先买好了船票，定好了房舱。